Joh 16 | NdeIBE | STEP | “Ngilitshela konke lokhu ukuze ukholo lwenu lunganyikinyeki.

John 16

1 “Ngilitshela konke lokhu ukuze ukholo lwenu lunganyikinyeki. 2 Bazalixotsha esinagogeni; ngempela siyeza isikhathi lapho lowo obulala omunye wenu uzakholwa ukuthi wenzele uNkulunkulu into enhle. 3 Bazakwenza izinto ezinjalo ngokuba kabamazanga uBaba loba mina. 4 Lokhu ngilitshela ukuthi nxa sesifika isikhathi lizakhumbula ukuthi ngilixwayisile. Kangilitshelanga lokhu ekuqaleni ngokuba ngangilani.

Umsebenzi KaMoya ONgcwele

5 “Khathesi sengisiya kuye ongithumileyo, kodwa kakho kini ongibuzayo ukuthi, “Uya ngaphi na?’ 6 Ngenxa yokuba sengizitshilo lezizinto, selihlulukelwe. 7 Kodwa ngilitshela iqiniso ngithi: Kulungele lina ukuba ngihambe. Ngaphandle kokuthi ngihambe uMeluleki akayikuza kini; kodwa uma ngihamba, ngizamthuma kini.

8 Uzakuthi angafika uzatshengisa umhlaba ukuthi ulahlekile ngesono langokulunga langokwahlulelwa: 9 ngokwesono, ngokuba abantu kabakholwa kimi; 10 ngokulunga, ngokuba ngiya kuBaba, lapho elingasayi ukungibona khona njalo;

11 njalo ngokwehlulelwa, ngokuba umbusi walo umhlaba usemiselwe ukulahlwa.

12 “Kusekunengi engingakutsho kini kodwa kungalisinda. 13 Kodwa yena uMoya weqiniso nxa esefikile uzalikhokhelela kulo lonke iqiniso. Kazukuzikhulumela yena; uzakhuluma lokho akuzwayo kuphela, njalo uzalitshela lokho okusezakuza. 14 Uzaletha inkazimulo kini ngokuthatha kulokho okungokwami akwenze kwazakale kini. 15 Konke okungokukaBaba ngokwami. Yikho ngithe uMoya uzathatha kokungokwami akwenze kwazakale kini.

16 “Sekuyisikhatshana ukuba lingabe lisangibona, kodwa ngemuva kwesikhatshana lizangibona.”

Usizi Lwabafundi Luzakuba Yikuthokoza

17 Abanye babafundi bakhe bakhulumisana bathi, “Utshoni ngokuthi, ‘Ngemuva kwesikhatshana kalisayikungibona,’ njalo athi, ‘Kuthi ngemuva kwesikhatshana lizangibona njalo,’ njalo athi, ‘Ngokuba ngiya kuBaba’ na?”

18 Babelokhu bebuza besithi, “Utshoni ngokuthi ‘isikhatshana’? Kasikuzwisisi lokho akutshoyo.”

19 UJesu wabona ukuthi babefuna ukumbuza ngalokhu, wasesithi kubo, “Liyabuzana ukuthi bengisitshoni ngize ngithi, ‘Ngemva kwesikhatshana kalisayi kungibona’? 20 Ngilitshela iqiniso ukuthi lizakhala lilile kodwa umhlaba wona uthokoza. Lizaba losizi, kodwa usizi lwenu luzakuba yikuthokoza. 21 Owesifazana nxa ebeletha uzwa ubuhlungu ngoba isikhathi sakhe sesifikile; kodwa nxa umntwana esezelwe uyakhohlwa ubuhlungu lobo ngenxa yentokozo yokuthi sekuzelwe umntwana emhlabeni.

22 Kunjalo lakini: Manje yisikhathi senu sosizi, kodwa ngizaphinda ngilibone beselithokoza, njalo kakho ozaphinda alemuke intokozo yenu.

23 Ngiqinisile ngithi uBaba uzalinika loba yini eliyicelayo ngebizo lami. 24 Kuze kube manje kalikaceli lutho ngebizo lami. Celani, lizakwamukeliswa, ukuze ukuthokoza kwenu kuphelele.

25 “Lokuba bengikhuluma ngemizekeliso, siyeza isikhathi lapho ngingasayikukhuluma ngaleyondlela kodwa engizalitshela khona kamhlophe ngoBaba. 26 Ngalelolanga lizacela ngebizo lami. Kangitsho ukuthi ngizalicelela kuBaba. 27 Hatshi, uBaba yena ngokwakhe uyalithanda ngoba lingithandile lakukholwa ukuthi ngavela kuNkulunkulu. 28 Ngavela kuBaba ngangena emhlabeni; okwamanje sengiwutshiya umhlaba sengibuyela kuBaba.”

29 Abafundi bakaJesu basebesithi, “Khathesi usukhuluma kamhlophe ungasazekelisi.

30 Khathesi sesibona ukuthi uyazazi izinto zonke lokuthi kakusweleki ukuthi ubuzwe imibuzo. Lokhu kwenza ukuthi sikholwe ukuba wavela kuNkulunkulu.”

31 UJesu waphendula wathi, “Khathesi selikholwa! 32 Kodwa siyeza isikhathi, sesifikile, lapho elizachitheka khona, ngulowo aye ekhaya lakhe. Lizangitshiya ngedwa lonke. Ikanti kangingedwa ngoba uBaba ulami.

33 “Ngilitshelile izinto lezi ukuze kuthi kimi libe lokuthula. Kulo umhlaba lizakuba lokuhlupheka. Kodwa yimani isibindi! Sengiwunqobile umhlaba.”